උසකින් වැටී
දතකුත් කැඩී
මම ඉන්නවා
ඔහෙ වැනි වැනී

අහසත් උසක්ද
මම ගිය උසක්
කැඩුනට දතක්
මම දැන් රජෙක්

බොරුවක් වුනත්
තව සැරසුවොත්
මත්තට එයත්
වෙයි ලොකු ජයක්

අනේ කූඹ්යනේ
අපටත් රජෙක් ඉන්නේ
ඉතින් අපි හැමදා
කිරිබත්ම කන්නේ

හෙටක පැතුම........

මගේ සඳවත
කිමද මුනිවත
බැඳුනු අතැඟිලි
අතැර යායා

අරා ගුවනත
සුදිලි වුවනත
දවා හදවත
සැඟව යායා

පෙමින් නිවි සිත
සොවින් බර වත
මතක අන්දර
කිති කවායා

සුපෙම් සුන්දර
එකව් අන්දර
හදෙහි නින්නඳ
රැව් නඟාවා!!!!!

දැව්වේ අහස කලු කරවා වහින්නටයි
මැව්වෙ සහස් සුපතුම් හද බැඳෙන්නටයි
ගව්වේ දුරක නොව හිත ලඟ රැඳෙන්නටයි
සෙව්වේ ඔබම විඳි කඳුලින් මිදෙන්නටයි

පහන් තාරකා...........

අහස් ගව්වෙන් එහා
ඉමක් නොපෙනෙන දුරක
පහන් නොවනා රැයක
කවක් වී සුගැයෙන්න

අමාවක එලි කඩෙක
අහස්තල පියසි මත
දුරුත්තෙන් මතුයලිත්
එපා ඔබ සුදිලෙන්න